LAOAG CITY – Nagtalinaed iti ospital ti driver ti private tricycle kalpasan nagdidinungpar ti maysa a kotse ken maysa a pick-up iti Brgy. 40 Balatong ditoy ciudad ti Laoag.
Nabigbig ti driver ti tricycle a ni Greg Habitan, agtawen ti 35, residente iti Brgy. Pila ditoy ciudad, idinto ti agmanmaneho iti kotse ni Carmelo Ventura, agtawen ti 38 ken residente iti Brgy. 40 Balatong ditoy ciudad, ken ti nagmaneho iti pick-up a ni Abemar Rupisan Jr., agtawen ti 29 ken residente iti Brgy 21, Castro St, ditoy ciudad.
Basar iti imbestigasion, agpapammianan ti tricycle a sarsarunnuen ti pick-up idinto a kellat nag left-turn ti ti maysa a kotse nga agturong iti abagatan.
Mannarimaan a matamtaming ti driver ti tricycle iti Gov. Roque Ablan Sr. Memorial Hospital kalpasan a nagsagaba daytoy iti nagduduma a sugat iti paset ti bagina.
Kabayatanna, inbatad ti Philippine National Police – Police Traffic Division a saan pay a nagsasarita dagiti nairaman iti nadakamat nga insidente.
