LAOAG CITY – Natukkol ti akin-kannigid nga ima ken saka ti maysa lalaki kalpasan a nagdinnungpar ti SUV ken truck iti ili ti Sarrat.
Daytoy ti inbatad ni Police Lt. Manuel Ordonio, ti chief of police iti ili ti Sarrat.
Inlawlawag ni Ordonio a basar iti inisyal nga imbestigasyon da ket immagaw iti linya ti SUV kabayatan nga agpadpadaya idinto nga agpapalaud met ti truck.
Segun ken ni Ordonio, ti nangiturong ti SUV ket taga Barangay 14, San Juan iti ili ti Sarrat idinto a ti driver ti truck ket residente iti ili ti San Nicolas.
Kuna ti opisyal a possible a nakaturog ti driver ti SUV rason a saanna a napuutan a sabalin ti turturungen ti luganna a nagresulta ti panagdinnungpar da iti truck.
Innayon na nga umabot iti agarop maysa nga oras sakbay a naakkal dagiti otoridad ti driver ti SUV iti uneg gapu iti nakaro a pannakaipit na.
Naitaray ti driver ti SUV iti Black Nazarene Hospital ken mangnamnama ni Ordonio a kalpasan a makasarita da ti dua a partido ket masolbar da met laeng a dagus ti nasao a napasamak.
