LAOAG CITY – Natay ti driver ti van kalpasan a naidungpar iti kongkreto nga alad iti Barangay Caparispisan iti ili ti Pagudpud.
Daytoy ti kinumpirmaran ni Police Major Carlo Abing, ti chief of police iti nasao nga ili.
Binigbig ni Abing ti biktima a ni Silvano Tugade Rondal, agtawen ti 56, residente iti Barangay Napo iti ili ti Badoc.
Inbatad ni Abing a basar iti imbestigasyon da, napaspas ti panagpataray ni Rondal ken idi nadanun na ti agkurba a paset ti kalsada ket napukawan ti kontrol a nangitunda ti pannakaidungpar na iti kongkreto nga alad iti nadakamat a lugar.
Gapu iti napasamak ket nagsagaba ti nakana a sugat iti nagduduma a paset ti bagi ti biktima kangrunaan na iti ulo na ken naipit pay iti uneg ti lugan na.
Dagus met a nagresponde dagiti kameng ti Municipal Disaster Risk Reduction and Management Council, Bureau of Fire Protection, Municipal Health Office ken ti Philippine National Police no sadinno nga iti pannakaitaray ti biktima iti kaasitgan nga ospital ket naideklarar a pimmusayen.
Mainaig iti daytoy, naamoan dagiti otoridad a ti biktima ket naggapo iti maysa a paggiinuman ken mapapati nga addan daytoy ti impluwensya ti nasanger.
