LAOAG CITY – Nadiskobre ti maysa a drone nga adda kargana nga explosive device ti nangipaay ti pannakadistorbar ti eropuerto iti Leipzig a rason ti pannakasuspende ti operasion kadagiti flights ken diversion dagiti dadduma nga eroplano.
Maysa a kameng ti staff ti eropuerto ti nakadiskobre iti drone bayat iti natalged nga operasion ti cargo flights iti paset ti airport south runway. Insigida a naiwayat ti bomb disposal robot kas paset ti imbestigasion, ken naikkat ti detonator a naikapet iti drone.
Malaksid iti daytoy, adda pay ti saan pay a nabigbig a flying object ti naidungpar iti cargo plane kalpasan a nalappedan ti panagdisso ti eroplano gapu iti pannakaserra ti runway. Bassit laeng ti nadadael ti eroplano ket sitatalged a nagdisso iti eropuerto ti Hannover.
Temporario a nasuspende ti flight operations kalpasan ti pannakaduktal ti drone no sadinno a naluktan met ti amianan a runway.
Mainaig iti daytoy, kuna dagiti otoridad a dagiti sumagmamano nga eroplano, agraman ti eroplano a pangpasahero, ti napilitan a nag-divert iti dadduma nga eropuerto.
Kabayatanna, kalpasan ti pannakadiskobre iti explosive device, dagiti German state prosecutors ti nangituloyen ti imbestigasion, a kaduada ti Central Office for Extremism Saxony (ZESA) ken dagiti opisial manipud iti Police Terrorism and Extremism Defense Center (PTAZ) counter-terrorism law enforcement unit.
