LAOAG CITY – Balligi a naarestar ti maysa a drug personality iti Search Operation iti Barangay Rayuray iti siudad ti Batac.
Segun ken ni P/Lt.Col. Adrian Gayuchan, Hepe ti Batac City Police Station, ti suspek ket nabigbig kas alyas Espencer, agtawen ti 28 ken residente iti nasao a barangay.
Inbatadna nga iti panagsukimat dagiti otoridad iti pagtaengan ti suspek ket nakumpiskarda ti 18 a pedaso ti heat-sealed transparent plastic sachet a naglaon ti maipagarup a shabu nga agdagsen ti sumurok-kumurang a lima a gramo nga agbalor ti 34 a ribu a pisos, 13 a pedaso ti heat-sealed transparent plastic sachet a naglaon ti maatap a napagango a bulong ti marijuana nga agbalor ti 40,720 a pisos ken dadduma pay a drug paraphernalia.
Kunana a mapilaan ti kaso ti suspek gapu iti panaglabsing iti Republic Act No. 9165 wenno ti Comprehensive Dangerous Dugs Act of 2002.
Innayonna a ti nasao nga operasion ket nagbinnuligan ti Philippine Drug Enforcement Agency Regional Office I – Ilocos Norte Provincial Office (PDEA RO I – INPO), Batac City Police Station, Ilocos Norte Police Provincial Office – Provincial Drug Enforcement Unit (INPPO-PDEU), INPPO Provincial Intelligence Unit (INPPO-PIU) ken Police Regional Office I-Regional Intelligence Division (PRO I-RID).
