LAOAG CITY – Kinumpirmaran ni Police Chief Inspector Rodelio Santos, ti chief of police iti PNP-Batac City ti pannatay ti subject da iti drug buy-bust operation iti Barangay Sumader ti nasao a ciudad.
Nabigbig daytoy a ni Joseph Guitap, agtawen iti 40, ken residente met laeng ti nasao a barangay.
Inlawlawag na a bayat ti operasyon ket nadlaw ni Guitap a pulis ti katransaksyon na isut gapuna a pinaltugan a ti pulis, ngem saan a naan-ano ti maseknan gapu ta naka-bullet proof.
Gapu ti daytoy, napilitan dagiti pulis a limmaban a nagresulta iti ipapatay ni Guitap.
Segun ken ni Santos, malaksid a drug personality ni Guitap ket adda pay dagiti sinango na a kaso a panagtatakaw iti nagduduma nga ili ditoy probinsya.
Inbatad na a malaksid ti maysa a sachet a maatap a naglaon ti shabu nga inlako na iti nagserbi a poseur buyer ket adda pay ti tallo a sachet a naala da iti ikot ti suspek a tallo a sachet a naglaon ti napagango a bulong ti marijuana.
Malaksid ti daytoy, kuna ni Santos a naala da pay iti ikot ti suspek ti maysa a 38 cal. a paltog nga adda bala na.
Inpetteng ni Santos nga uray pimmusay ni Guitap ket pilaan da latta ti kaso.
