LAOAG CITY – Sabali pay a naimballigian a search warrant operation ti inwayat ti PNP-Laoag iti Brgy. 62-B Madiladig.
Ditoy a naalaan ti 8 a nagbarintiddog a plastic sachet a naglaon iti maatap a shabu a naikabil iti nagangawan ti ice cream, cellphone ken kuwarta a sinsilyo iti pagtaengan ti agnagan iti Lorefiel Amigo agtawen ti 40, addaan ti asawa, driver ken drug surenderer.
Inmatangan dagiti Bgy. Officials, taga DOJ ken kameng ti media ti nasao nga operasyon.
Mainaig iti daytoy, saan a maako ti pamilya Amigo a nagsubli ti kabsat da iti madi nga aramid.
Segun ken ni Lorfina Domingo kabsat ni Lorefiel, isu da pay ketdi ti nangkunbinsir iti kabsat na a sumuko idi naamuan da nga adda aramid na mainaig iti maipawil a droga.
Ibilang da a planted ken frame-up ti napasamak iti kabsat da ken nakasagana da nga ilaban daytoy.
Mainaig iti daytoy, inbatad ni P/Insp. Norman Pentang, Chief ti Investigation Section ti PNP-Laoag a bunga ti resulta ti inwayat da a validation iti report a nagsubli ni Lorefiel Amigo iti madi a bisyo na.
Segun ken ni Pentang, simmuko ni Amigo bayat ti Oplan Tokhang itay kallabes ken naminpinsan a gundaway a nagatendar iti programa para kadakuada a drug surenderee.
Kinuna met ni P/Supt. Dominic Guererro, Chief of Police, a karbengan dagiti siasinnuman a mangilaban ti kalintegan da no ti pammati da ket saan umiso ti wagas ti pannakaoperar da.
Reaksiyon daytoy ni Guererro iti inbatad ti maysa a kabsat ni Amigo a plano da nga ilaban ti kalintegan ti kabsat da iti pammati da a planted ken na-frame up daytoy.
Innayon pay ni Guererro nga adda da pay dagiti manarimaan nga ival-validate da a report seknan met laeng iti nasao a kampanya.
