LAOAG CITY – Ballaigi nga inarestar dagiti kameng ti PNP-Laoag ti maysa a drug surenderee bayat ti naiyuswat a drug buy bust operation iti uneg ti maysa nga hotel iti Bgy. 51-A Nangalisan ditoy ciudad ti Laoag.
Nabigbig ti suspek a ni Arwin Mina y Garvida agtawen 41 addaan ti asawa tubo iti Brgy. 1 iti ili a Bangui ken residente iti Bgy.Buyon iti ili a Bacarra.
Naala iti ikot ni Mina ken iti rinentaan na a kuwarto a Room 7 dagiti 11 a sachet a naglaon ti maatap a shabu ken ti buy bust money a sangaribo a pisos a nausar iti nasao nga operasyon.
Nairamraman pay a kinumpiskar dagiti pulis ti lugan ni Mina a maysa a Toyota Grandia.
Iti agdama, addan iti kustodyar ti PNP-Laoag ti suspek para iti pannakaisagana ti maipila a reklamo kontra iti daytoy.
Rum-rumwar a ni Mina ket maibilang nga adda iti Prov’l Level Category kadagiti masipsiputan a drug personality ditoy probinsiya.
Mainaig iti daytoy, naglikudan ni Arwin Mina a kukua na dagiti naala bayat ti kaadda na iti uneg ti kuwarto iti rinentaan na nga hotel iti Bgy. 51-A Nangalisan ditoy ciudad ti Laoag.
Segun kenkuana, nakigtot laengen idi adda agtoktok ken linuktan na ti ridaw ti kuwarto gapu ta inbaga da a pulis da ken pinagpakleb da daytoy.
Saan na nga inlibak a drug surenderee daytoy itay tawen 2018 ngem nagbalbaliwen daytoy.
Inlawlawag na nga adda iti nasao nga hotel gapu ta agin-ina kalpasan a nagriri da iti asawa na.
