LAOAG CITY – Binagkong ti maysa a drug surrenderer ti maysa a mannalon iti Brgy. 11, Cabangaran iti ili ti Paoay bayat nga adda da iti uneg ti pagtaengan ti anak ti biktima.
Nabigbig ti biktima a ni Alfredo Cabuyadao, agtawen ti 33, naasawaan residente ti Brgy. 5, Nalasin, iti nasao nga ili idinto a ti suspek ket ni Christian Dumlao, agtawen ti 29, naasawaan, ken residente iti Brgy. 21, Pambaran iti nasao nga ili.
Segun ken ni Police Staff Sgt. Mark Dave Villegas, imbestigador ti PNP Paoay, kabayatan nga umin-inom ti arak ni Cabuyadao ken Dumlao kas panangselebrar iti panagkasangay ti anak na a ni Julius Reymund Martin ket naaddaan da ti saan a panagkinnaawatan.
Kuna na a nangala ni Dumlao ti immuko nga agatiddog ti nasurok walo a pulgada ken inusarna a pinangbagkong iti biktima.
Segun kenni Villegas, naminsan a binagkong ni Dumlao ni Cabuyadao iti akinkannigid a parte ti barukongna ken dagus a naglibas kalpasan iti nasao nga insidente.
Kalpasan ti sumagmamano a minutos ket bulontaryo a simmuko ti suspek.
Agtultuloy a maag-agasan ti biktima iti Mariano Marcos Memorial Hospital and Medical Center iti siudad ti Batac idinto a maisagsagana ti maiyannatop a kaso kontra ti suspek.
