LAOAG CITY – Inrakurak ni Social Welfare and Development Secretary Rex Gatchalian ti natibker a takder ti gobierno tapno naan-anay a maparmek ti child labor iti pagilian.
Inaaramid daytoy ni Gatchalian kagiddan ti panangselebrar iti World Day Against Child Labor ita nga aldaw Hunyo 12.
Inpetteng ni Gatchalian a ti child labor ket mangag-agaw ti waya-waya, panagbalin nga inosente ken dagiti karbengan iti kada ubing.
Kuna a napateg a pagtitinnulungal ti intero a pagilian tapno malabanan daytoy iti babaen ti pannakapatibker dagiti linteg, panangipaay ti tulong kadagiti agkasapulan ken panangtulong kadagiti pamilya a maaddaan ti disente a trabaho.
Naamoan nga iti babaen ti SHIELD program ti Department of Social Welfare and Development, nasurok a 12,000 a child laborers ti natulunganen ti ahensya sipud idi 2021 agingga iti 2024, no sadinno nga 4,000 ditoy ti naisublin iti bukod da a pamilya ken komunidad.
Agtultuloy met ti pannakikoordinar ti Department of Social Welfare and Development ken iti dadduma pay nga ahensya ti gobierno tapno makaipaay kadagiti programa a gagem na nga ikkan ti namnama ken dignidad dagiti ubbing ken masigurado ti panagadal da a saan a maipadalan iti child labor.
