LAOAG CITY – Inpasingked ni Mrs.Cynthia Ablog, Social Worker iti Department of Social Welfare (DSWD) Regional Office a nakabase ditoy ciudad ti Laoag a napintas ti pannakataripato iti ti agtawen ti dua nga ubing a lalaki Sanctuary kalpasan nga innala da manipod iti maysa a pamilya iti Barangay Pila ditoy ciudad.
Inlawlawag ni Ablog iti Bombo Radyo Laoag a napan a dagus iti balay ti nasao a pamilya kalpasan a naipakaammo kadakuada nga adda ti ay-ayawanan da nga ubing a saan da a kapkapin-ano.
Segun ken ni Ablog, ti ina ti ubing ket maysa a Guest Relation Officer (GRO) ken saanda nga ammo ti ayanna iti agdama.
Nupay kasta, inbatad na a birbiruken da ti ina ken ama ti ubing tapno ma-assess da no kabaelan da nga aywanan ti anak da tapno maisubli met laeng kadakuada.
Inbatad na nga innala da ti ubing iti pamilya a nangaywan kenkuana gapu ta awan ti lisensyada da nga agbalin kas foster parents ti maseknan.
Kuna na a basar ti Republic Act (RA) No. 10165 wenno Foster Care Act of 2012, dagiti laeng lisensyado nga agbalin a foster parents ti mabalin nga agaywan ti saan da a kapkapin-ano nga ubing.
Gapu ti daytoy, kuna ni Ablog a nawaya ti pamilya a nagaywan ti ubing a mapan agaplikar ti lisensya kas foster parents.
Kabayatanna, kuna ni Ablog nga umabot pay laeng ti 13 dagiti lisensyado a foster parents ditoy Ilocos Norte.
Innayon na a dagiti mangayat a mangala ti lisensya na kas foster parent ket mapan da laeng iti opisina ti DSWD tapno ma-assess da no kabaelan da ti agtaraken wenno agaywan ti saanda a kapkapin-ano nga ubing.
