LAOAG CITY – Inpasigurado ti Department of Social Welfare and Development a saan laeng a ti datos wenno numero ti naipamaysada tapno maikeddeng dagiti target a benepisiario iti programada a social protection.
Iti budget briefing iti Kamara, sinaludsod ni 4Ps Party-list Representative JC Abalos ti Department of Social Welfare and Development maipapan iti panangmatmatna iti panagadal ti National Economic and Development Authority a ti binulan a threshold para iti pamilia nga addaan iti lima a miembro ket 9,581 pesos wenno 64 pesos kada tao iti uneg ti maysa nga aldaw.
Segun ken ni Social Welfare Secretary Rex Gatchalian, saan nga umdas ti P21 a budget para iti taraon ken saanda nga umanamong a dagiti indibidual a makabusbos iti nasurok nga P64 ti kada aldaw ket saanen a maibilang a “food poor”.
Ngem kunana a saan laeng a daytoy ti “indicator” para kadagiti programa kontra iti kinapanglaw.
Inlawlawag ni Gatchalian a 70 porsiento ti Social Welfare and Development Indicator ket saan a kuarta ti nakaibasaran iti social adequacy ken pakabuklan a pagimbagan kas iti langa ti pagtaengan ti maysa a pamilia ken accessibility iti health care ken edukasion.
Patien ti opisial a kasapulan ti “human factor” ken ti panangmatmat ti maysa a social worker iti kasasaad ti tunggal pamilia tapno marukod ti inaldaw a panagbiag ken saan a babaen kadagiti mata dagiti ekonomista.
