LAOAG CITY – Inpasingked ni Social Welfare Secretary Rex Gatchalian iti publiko a saan a kabaelan dagiti politiko a kontrolen ti panangiyimplementar da ti P26 bilyong aid program ti Department of Social Welfare and Development (DSWD) a nairaman iti 2025 national budget.
Segun ken ni Gatchalian, saan a kasapulan ti request manipod iti siasinno man a politiko wenno opisyal ti gobierno iti potential beneficiaries ti Ayuda para sa Kapos ang Kita Program (Akap) gapu ta ti Department of Social Welfare and Development laeng ti sole implementer na.
Inlawlawag daytoy ni Gatchalian kalpasan a naisubli ti P26 bilyon a pondo para iti Ayuda para sa Kapos ang Kita Program (Akap) iti 2025 General Appropriations Act (GAA).
Ti Ayuda para sa Kapos ang Kita Program (Akap) ket maysa a social assistance program a saan laeng a para kadagiti maibilang a kakukurapayan a Pilipino no di ket para kadagiti naapektaran ti inflation.
Basar iti Department of Social Welfare and Development, ti one-time cash assistance ket aggatad ti P3,000 agingga iti P5,000 iti eligible beneficiaries.
Maipalagip nga inlungalong ni Senador Imee Marcos ti pannakaikkat ti Ayuda para sa Kapos ang Kita Program manipod iti budget ti Department of Social Welfare and Development iti sumaruno a tawen.
Para kenkuana, napatpateg dagiti programa nga addaan ti long-term benefits kas ti Sustainable Livelihood Program ken Kapit-Bisig Laban sa Kahirapan-Comprehensive and Integrated Delivery of Social Services.
