LAOAG CITY – Binallaagan ti Department of Social Welfare and Development (DSWD) ti publiko kontra kadagiti politiko a mangus-usar iti ahensya tapno agpapansin wenno agar-aramid ti nagduduma nga eksena aglalo ket umadanin ti 2025 Midterm election.
Inbatad ni Department of Social Welfare and Development Undersecretary Edu Punay nga obserbaren koma a naimbag dagiti mapaspasamak gapu ta no dadduma ket maus-usar dagiti ahensya ti gobierno iti kampanya dagiti kandidato.
Inrakurak daytoy ni Punay kalpasan nga inbatad ti Office of the Vice President (OVP) nga adda ti sumagmamano a beneposyaryo nga inrefer ti ahensiya ti maipagarop a saan nga ikaskaso ken tultulungan ti social welfare offices.
Inpasingked ni Punay a ti Department of Social Welfare and Development ket saan nga agpulpulitika wenno agpapausar kadagiti pulitiko kadagiti programa da.
Kuna na nga awan ti direktiba ti Malacañang wenno uray ni Department of Social Welfare and Development Sec. Rex Gatchalian nga agbalin da a selective iti panagibunong kadagiti ayuda wenno nagduduma a programa kadagiti marigrigat nga umili.
Innayon na nga amin a benepisaryo nga agkalikagom ti cash aid manipod iti Department of Social Welfare and Development ket kasapulan a dumalan iti screening ken interviews kas naiget a mandato iti auditing rules.
Inpalgak pay ni Punay a saanen a kasapulan dagiti benepisaryo ti endorsements manipod iti siasinno man a politiko tapno makaala ti serbisyo ti ahensiya.
