LAOAG CITY – Nagballaag ti Department of Social Welfare and Development (DSWD) kontra iti panagusar kadagiti peke a dokumento tapno makaala ti tulong manipod kadagiti programa ti ahensiya kas ti Assistance to Individual in Crisis Situation (AICS) wenno aniaman nga ahensya ti gobyerno.
Iti maysa nga statement, inbatad ni Department of Social Welfare and Development spokesperson ASec. Irene Dumlao a naiget a maipawil ti panagusar ti peke nga identification cards wenno aniaman a palsipikado a dokumento ken nagballaag nga adda ti maiyannatop a pannusa iti babaen ti Revised Penal Code.
Inaramid daytoy ti Department of Social Welfare and Development official kalpasan ti insidente idi Miyerkules, Pebrero 11 no sadinno a nalapdan ti maysa a social worker manipod iti ahensya iti National Capital Region ti maysa a lalaki a nanggandat nga agkiddaw ti tulong medical iti babaen ti programa nga ti Assistance to Individual in Crisis Situation.
Ditoy nga inpresentar ti nasao nga indibidual ti peke a person with disability wenno PWD ID card no sadinno a kabayatan ti pannakainterview na ket saan nga agtugma dagiti ibagbaga na kadagiti insumitir na a dokumento.
Dagus a naireport ti insidente iti Barbosa Police Station tapno mairekord iti police blotter.
Nabalakadan ti publiko nga ireport a dagus kadagiti otoridad ti siasinno man nga indibidual nga agus-usar kadagiti peke a dokumento tapno maliklikan ti panangloko.
