LAOAG CITY – Nagpanawagan ti Department of Social Welfare and Development (DSWD) partikular ti National Authority for Child Care (NACC) kadagiti social media platforms kas ti Meta nga ad-adda a paigetan a tutukan ti online baby selling ken ilegal nga adoption groups.
Inbatad ni Rowena Macalintal a manarimaanen ti pannakikoordinar ti ahensia iti Philippine National Police ken Women and Children Protection Center tapno tutukan dagiti Facebook groups nga aglaklako ti ubing wenno agitantandudo ti online adoption.
Umabot iti presio dagiti maladaga manipud iti P8,000 agingga iti P130,000 ken adda dagiti dadduma pay a grupo nga adda ti sumurok 13 a ribu a miembro.
Inlawlawag ni Macalintal a saan a mabalin a naan-anay nga ikkaten ti amin a grupo gapu ta adda ti ongoing law enforcement operations ken entrapment activities.
Nupay kasta, mabalin nga agsungbat ti agpada a sellers ken buyers iti babaen ti linteg gapu ta ilegal ti online adoption ditoy Pilipinas.
Inpetteng ti opisial a ti lehitimo a proseso ti adoption ket agpaut laeng ti sumurok-kumurang siam a bulan no sumurot kadagiti amin a dokumento ken pagannurotan.
Mainaig iti daytoy, para kadagiti nagannak a saanen a kabaelanna pay nga aywanan dagiti annakda, kuna ti opisial a mabalinda nga umasideg iti Department of Social Welfare and Development (DSWD) partikular ti National Authority for Child Care (NACC) wenno dadduma pay a lisensiado a child care facilities para iti umno nga assessment ken counseling.
Nagpanawagan ni Macalintal a maaddaan ti pormal a dialogue ti gobierno ken Meta tapno ipawil ti panagaramid kadagiti grupo nga aglablabsing iti linteg.
