LAOAG CITY – Mangipatungpal ti Department of Social Welfare and Development (DSWD) ti special payout iti sumaruno a lawas para kadagiti tricycle driver iti Metro Manila.
Daytoy ket kalpasan a saan a nakaawat dagitoy ti P5,000 nga ayuda ita a lawas gapu iti aberya wenno awan da iti master list.
Inpasingked ni Department of Social Welfare and Development spokesperson Asec. Irene Dumlao a maakomodar dagiti saan a naikkan ti cash aid idinto nga agtultuloy met ti panangtulong iti Crisis Intervention Unit.
Karaman ditoy dagiti tricycle driver iti Metro Manila a saan a nakaala ti ayuda iti napalabas nga aldaw wenno awan iti orihinal a listaan.
Maisayangkat ti special payout iti nagduduma a lokal a gobierno.
Mainaig iti daytoy, nabalakadan dagiti driver nga umasideg iti TODA officer da wenno iti DSWD help desk kadagiti payout site tapno mairaman iti listaan, no sadinno a kasapulan laeng a mangitugot ti valid driver’s license ken photocopy daytoy.
