LAOAG CITY – Nagtataripnong da DSWD Secretary Rolando Bautista, Governor Matthew Marcos-Manotoc ken ni Mr. Melchito Castro, ti mangidadaulo iti Office of Civil Defense – Region I iti kapitolyo probinsyal mainaig pay laeng ti iduduprak ti bagyo Ineng ditoy probinsya.
Iti eksklusibo nga interview ti Bombo Radyo ken ni Castro, inbatad na nga addan dagiti sumagmamano a kiniddaw ni Gobernador Manotoc a naited da.
Kuna na nga adda met dagiti nakasagana a relief goods ti Regional Council nga ited da no agkurang ti ibunbunong ti gobierno porbinsyal.
Kabayatanna, kuna ni Castro a basar ti dimmanon iti opisina da a datos ket nakurang laeng nga 600 a milyon a pisos ti balor dagiti nadadael ditoy probinsyak kalpasan ti idadayyeg ti bagyo Ineng.
Nupay kasta, inbatad na nga inisyal pay laeng daytoy isut gapuna a mangiyuswat da pay ti official assesstment, ken mabalin a makissayan wenno manayunan ti nasao a gatad.
Innayon na a mangisayangkat da pay ti post disaster analysis tapno maamoan no usto wenno nagkurang ti assessment ti probinsya.
Kabayatanna, inbalakad ni Castro nga agbalin nadisiplina iti panagibelleng kadagiti basura gapu ta dagitoy ket mabalin a maurnung kadagiti kanal ken karayan a makaabbeng ti panagayus ti danom gapu ta daytoy ti mangitunda ti layos.
Iti sabali a bangir, inbatad ni Mr. Nelson Pablo, maysa kadagiti mangidadaulo ti sanghera idiay ili ti Bacarra a nagturong da iti kapitolyo probinsyal tapno makasarita da ni Agriculture Secretary William Dar ken ni DSWD Secretary Ronald Bautista.
Nagturong da Dar ken Bautista ditoy probinsya gapu ti kaado dagiti nadadael iti iduduprak ti bagyo Ineng.
Segun ken ni Pablo, ti laeng kiddawen da ken ni Dar ket ti pannakaipangato ti presyo ti irik ken matarimaan a dagus dagiti nadadael a kanal idinto a ni Bautista ket kiddawen da met ti pannakaisubli kadakuada dagiti napukaw a pagbiagan da gapu ti nasao a bagyo.
Mangnamnama ni Pablo a makaabrot da intono sumaruno a panagani gapu ta naawat dan a bassit laeng ti maapit da kadagiti mulada a pagay a naapektaran ti bagyo Ineng.
