LAOAG CITY – Pabor ni Department of Social Welfare and Development (DSWD) Secretary Rex Gatchalian iti plano a panangrepaso ti food poor metrics a nagibasaran ti inparuk-at ti National Economic and Development Authority (NEDA) a ₱64 food threshold.
Karaman kadagiti dumalan iti naiget a panagadal ket ti komposisyon ti food basket a nagibasaran iti nasao a datos.
Segun ken ni Gatchalian, rumbeng laeng a balbaliw nga adalen ti nasao a matrix.
Kuna na a makatulong daytoy tapno agbalin nga updated ti pagibasaran kadagiti programa ti gobyerno para iti naur-urnus a programa para kadagiti marigrigat a Pilipino.
Karaman ditoyen ti Walang Gutom 2027: Food Stamp Program ti Department of Social Welfare and Development.
Maysa daytoy a flagship priority program ti Department of Social Welfare and Development a gagem na a parmeken ti involuntary hunger a mapaspasaran dagiti marigrigat.
Agtultuloy ti food stamp program ti Department of Social Welfare and Development ken target na a maabot ti maysa a milyon a benepisyaryo apaman a madanun ti 2027.
