LAOAG CITY – Inrakurak ti Department of Trade and Industry (DTI) nga ad-adda pay a paigetan da ti regulasyon para iti vaporized nicotine ken non-nicotine products (VNNDPs), karaman ti heated tobacco products (HTPs) iti pagilian.
Inbatad ti Department of Trade and Industry a ti nasao nga addang ket naggapo kadagiti panagbalbaliw iti Implementing Rules and Regulations (IRR) ti Republic Act No. 11900 wenno ad-adda a mabigbig kas “Vaporized Nicotine and Non-Nicotine Products Regulation Act”.
Kuna ti ahensya a gagem ti updated regulations a papigsaen ti consumer protection iti panangipasigurado nga amin a vape ken heated tobacco products iti merkado ket sumursurot iti naiget a pagannurutan iti kinatalged.
Iti agdama ket adda laeng ti 10 a Philippine Standard (PS) Licenses a naipaay para kadagiti nasao a produkto, no sadinno a tallo ti nasuspeno gapu iti saan da a panangsurot iti pagannurutan.
Naamoan a dagiti produkto a saan a sumursurot kadagiti pagannurutan ket mangitunda iti risgo para iti salun-at ti publiko ken manglapped iti napaot a panagdur-as ti industriya.
