LAOAG CITY – Kalikagum ti Deparment of Trade and Industry a mapapigsa pay ti kina-competitive dagiti Micro, Small, and Medium Enterprises.
Segun ken Provincial Director Amelia Galvez, naruay nga initiatibo ti maisaysayangkat para kadagiti lokal a negosyante tapno saan da a maatiwan wenno in-inot a maikkat bayat ti panagtulid ti panawen.
Kunana a kas paset ti One Town Own Product Next Gen Program, balligi a dimmalan dagiti pito babassit a negosyante ti seminar ken training maipanggep ti pannakapapintas ti product label ken nutritional analysis.
Patien ni Galvez a babaen iti daytoy nga initiatibo ket maiyam-ammo ti produkto da iti nalawlawa pay a paglakuan ken maitandudo ti market appeal dagitoy.
Innayon ti Provincial director a dagiti maipaaay a serbisio kadagiti Micro, Small, and Medium Enterprises ket maipasigurado kadakuada a saan laeng a magun-od da ti standards ti industria nu di ket malabsan pay daytoy.
Karaman kadagiti benepisyaryo ket aglaklako iti kangkong chips, saluyot chips, longganisa, peanut butter, fish bone, wild honey, ken dadduma pay.
