LAOAG CITY – Kalikagum ti Department of Trade and Industry a papintasen ken itandudo ti culinary tourism iti ciudad ti Batac.
Daytoy ti inbatad ni Ms. Maricor Racela iti Department of Trade and Industry.
Kunana nga adu dagiti maipannakkel a makan iti nasao a ciudad isut gapu na a kalikagum da a mapapintas ti packaging ken labeling dagitoy a produkto tapno makaawis iti ad-adu pay a customer.
Malaksid iti daytoy, mabalin pay a maiyam-ammo dagiti produkto iti sabali a probinsia ken iti ballasiw taaw.
Mainaig iti daytoy, adda iti maisayangkat a seminar para kadagiti negosyante tapno ditoy a maisuro kadakuada ti napintas a packaging ken labeling dagiti produkto da.
Kabayatanna, kuna ni Racela a ti culinary tourism ket paset laeng ti iyus-uswat a programa ti nasao nga ahensia a naisayangkat iti ciudad ti Batac.
Karaman pay ditoy ti immunan a naiwayat a seminar para kadagiti content creator ken vloggers, photo and video editing seminar, ken iti panag lay out ti One Barangay One Product.
