LAOAG CITY – Naka-alerto ti Department of Trade and Industry (DTI) iti posible a panagngato ti presio dagiti kangrunaan a magatang kageddan ti agsasaruno a panagngato ti presio dagiti produkto a petrolyo.
Insigida nga imbilin ni Trade Secretary Maria Cristina Roque kadagiti amin a pagopisinaanda ti naiget a panagbantay kadagiti grocery, supermarket, ken lokal a merkado tapno maliklikan ti saan nga umno a panagngato ti presio.
Impasigurado ti sekretario a ma-addaan ti regular ken updated a garaw ti presio tapno masungbatan nga insigida ti ahensia iti aniaman a panagbaliw iti merkado.
Nagballaag met ti Department of Trade and Industry (DTI) kadagiti negosiante, panggatangan, ken manufacturers a sumango dagitoy ti nadagsen a pannusa no agipatungpalda ti artificial shortage ken saan nga umno a price hike.
Iti met biang ti Department of Trade and Industry (DTI), mamati daytoy a saan pay a kasapulan a mangipatungpalda ti price cap kadagiti magatgatang gapu ta kontrolado pay laeng ti pakabuklan ti situasion.
