LAOAG CITY – Naisayangkat ti drug buy-bust operation iti Barangay 22 ditoy ciudad ti Laoag.
Nabigbig dagiti subject ti operasyon nga isuda Gina Bagongan, agtawen ti 41 ken ni Michelyn Intia, agtawen ti 33, agpada dagitoy a taga Mindanao ngem agdama da nga agkaskasera iti nasao a barangay.
Naamoan a ni Bagongan ket aglaklako ti nateng iti tiendaan idinto a ni Intia ken addan ti immuna a pannakatiliw na gapu met laeng iti illegal a droga.
Inpetteng ni Bagongan a saanna nga ammo no kasanu nga adda ti illegal a droga iti kasera da ken inpasingked na a saan nga aglaklako wenno agus-usar iti daytoy.
Kabayatanna, inbaga ni Police Chief Master Sergeant Harold Nicolas, ti mangidadaulo iti Provincial Drug Enforcement Unit (PDEU) ditoy probinsya a ni Bagongan ket addan iti Drug watchlist iti Provincial Level idinto a ni Intia ket maikatlon daytoy a pannakatiliw na gapu iti illegal a droga.
Nakumpiskar dagiti otoridad ti tallo a medium size a sachet a naglaon ti maipagarop a shabu, maysa a dakkel nga heat sealed plastic sachet a naglaon ti maipagarop a shabu, sangaribo a pisos a marked money ken ti 9 a ribo a pisos a boodle money.
