LAOAG CITY – Dua a babbai dagiti pimmusay kalpasan a nagdinnungpar ti motorsiko ken suv iti paset ti Brgy. Tarrag iti ili ti Pagudpud.
Binigbig ni PMaj. Joamar Andres ti hepe iti nasao nga ili, dagiti naglubbon iti motorsiklo nga agpada a a babbai ken residente iti Poblacion 2, Pagudpud.
Inbatad na a ti met nangiturong ti Navarra a lugan ket maysa a lalaki ken residente iti Brgy. 1 ditoy siudad ti Laoag.
Kuna na a basar iti inisyal nga imbestigasyon ti kapulisan, agpaamianan ti motorsiklo idinto nga agpaabagatan ti Navarra.
Inbatad na nga apaman a nadanon dagiti naglubbon ti motorsiklo ti kurbaan a paset ti kalsada ket na-overshoot daytoy rason a naidungpar iti kasinnabat na a Navarra.
Gapu iti daytoy, agpada a nagsagana ti nakana a sugat iti nagduduma a paset ti bagi dagiti naglubbon iti motorsiklo ken dagus dagitoy a naitaray iti ospital nga agpada da a naideklara a dead on arrival.
Kabayatanna, kuna ni Andres a saan met a masinunuo nu adda iti impluwensya ti nasanger dagiti maseknan idi napasamak ti desgrasya.
Agtultuloy ti imbestigasyon dagiti otoridad kalpasan ti insidente.
