LAOAG CITY – Nagdinnangran ti dua a babbai nga estudiante ti San Nicolas National High School gapu kadagiti maipagarup a maipadpadanon a sarsarita iti tunggal maysa kadakuada.
Segun ken ni Mr. Florante Riego, Principal iti nasao a pagadalan, dagiti maseknan nga agad-adal ket Grade 7 ken Grade 9 student.
Inbatadna nga insigida a pinaayabanna dagiti dua nga estudiante pakairamanan dagiti maseknan a nagannak dagitoy tapno mapagsasaritaan a naimbag ti napasamak nga insidente.
Inlawlawagna nga iti katengngaan ti komprontasion ti dua ket kellaat a tinungpa ti Grade 9 student ti Grade 7 student.
Gapu iti daytoy, simmubbot ti Grade 7 student isu nga inulud-ulodna ti Grade 9 student kageddan ti panangpungotna daytoy.
Mainaig iti daytoy, inpakaammo ni Mr. Riego a dumalan pay laeng iti Alternative Delivery Mode dagiti dua nga estudiante kabayatan a maiwaywayat ti imbestigasion.
Kabayatanna, naammoan a dati a nasinged nga agpagayam dagiti nadakamat nga agad-adal.
Immuna iti daytoy, agaawiden dagiti estudiante iti nasao a pagadalan idi kellaat nga adda ti saan a panagkikinnaawatan dagiti dua nga estudiante a nangitunda ti panagdinnangranda a nagaribungbongan dagiti naruay a padada met laeng nga estudiante.
