LAOAG CITY – Inbatad ni Barangay Chairman Oliver Valite iti Barangay Naglicuan iti ili ti Pasuquin nga adda ti inaramid da a petisyon kadwa da ti kabangibang da a Barangay Binsang para iti naan-anay a pannakapaserra ti maysa a poultry iti barangay da.
Daytoy ket gapu iti kaado ti ngilaw nga itunda ti nasao a poultry no sadinno a saan laeng nga iti Barangay Naglicuan ti apektado no di ket dumanon pay iti Barangay Binsang iti ili ti Pasuquin.
Inlawlawag ni Valite a saan da koman nga irenew pay ti business permit ti poultry iti napalabas a tawen gapu iti isu metlaeng a problema ngem adda dagiti naiyuswat a dayalogo iti nagbabaetan ti management ti poultry, Lokal a gobierno, Rural Health Unit, Sanidad ken dadduma pay a maseknan nga opisina.
Kuna na a kabayatan ti dayalogo ket nagkari ti management ti poultry nga urnusen da ti aniaman a nagliwayan da.
Innayon ni Valite nga adda pay ti naaramid nga Oath of Undertaking a nakailanadan ti panagkari ti management ti poultry a solbaren na ti problema.
Nupay kasta, kuna ni Valite a sipud idi ket saan met a tinungpal ti nasao a poultry ti inkari na no sadinno nga ad-adda pay a kimmaro ti panagado ti ngilaw a daytoy ti dakkel problema da a bumarangay.
Mainag iti daytoy, inpakaammo ni Valite a nagsarita dan iti mayor maipanggep iti nasao a problema ken inbilin na kadakuada nga agaramid dan ti resolusyon tapno iyendorsar na iti konseho.
Inpalgak na pay nga addan ti panag-fogging ti sanidad tapno maalay-ayan ti kaado ti ngilaw ngem kalpasan a nagpukaw ti asok ket nagsubli manen dagiti insekto.
Naamoan nga adda da pay dagiti maapektaran a billeting areas iti problema nga intunda ti nasao a poultry.
