LAOAG CITY – Inbatad ni Barangay Kagawad Ronnie Gascon iti Barangay 10 iti ili ti Bacarra nga umabot iti 13 ribo a pisos ti nabudol kenkuana ti maysa a kameng ti LGBTQ (lesbian, gay, bisexual, transgender, queer) community.
Segun ken ni Gascon, ti suspek ket nagpabigbig iti nagan na a “Jonathan Consigma” ken maipagarop a supervisor iti Business Process Outsourcing (BPO) iti ili ti San Nicolas.
Inlawlawag ni Gascon a bayat a nakaduty iti barangay hall ket dimteng ti scammer ken inpakaammo na a mangiwayat da ti job fair iti barangay da para kadagiti mayat a mapan agtrabaho iti Business Process Outsourcing iti ili ti San Nicolas.
Malaksid iti job fair ket inbaga pay ti suspek nga agibunong da ti school supplies kadagiti ubbing iti nadakamat a barangay a nakaragsakan ti barangay kagawad.
Kalpasan ti panagsarita dagiti dua ket kiniddaw ti suspek a kuyugen ti kagawad a mapan da agsursur kadagiti pangipaayan da ti school supplies.
Apaman a nakasubli dagitoy iti barangay hall ket adda ti tinawagan ti suspek iti cellphone na ken inbilin ti kasarsarita na a mapan ag-grocery para met kadagiti opisyal ti barangay ken usaren na paylaeng ti kwarta na.
Nupay kasta, insungbat ti suspek a saan nga umanay ti kwarta na, rason nga inbilin manen ti kasarsarita na a mangibaga paylaeng iti barangay kagawad ken bayadan da iti malem nga isu paylaeng ti papanda iti nadakamat a barangay.
Gapu iti daytoy, dagus met nga inyawat ti barangay kagawad ti kwarta na a 13 ribo a pisos ken ni Barangay Kagawad Celia Andres tapno isu ti kadwa ti suspek a mapan ag-grocery.
Naamoan ni Barangay Kagawad Gascon nga iti panagturong da Barangay Kagawad Andres ken ti suspek iti grocery ket dinawat ti naud-udi nga iggaman na ti kwarta ken cellphone ni Andres tapno saanna a maregreg.
Iti grocery nga immuna a nagturungan dagiti dua ket awan ti lakona a bagas rason a napan da iti sentro,ngem nagbalaw ni Barangay Kagawad Andres idi bigla lattan a nagpukaw ti suspek.
Agtultuloy ti imbestigasyon ti Philippine National Police mainaig iti nasao a pasamak.
