LAOAG CITY – Patpatalawen ti dua a barko ti Philippine Coast Guard ti nabirngasan a monstership ti Chinese Coast Guard (CCG) nga umas-asideg iti Pilipinas kangrunaanna iti paset ti Zambales.
Kageddan iti daytoy, nagpanawagan met ti gobierno iti China a patalawen wenno naan-anay nga i-withdraw ti monster ship-da manipud iti teritorio ti pagilian.
Inbatad ni National Task Force – West Philippine Sea (NTF-WPS) spokesperson Jonathan Malaya a ti deployment dagiti Chinese ships ita a tawen ket as-asidegen iti Philippine coast ken ti naudi a garaw daytoy ket maysa nga ‘intimidation tactic,’ a ti gagem ket pawilan dagiti mangngalap a Pilipino iti nasao a lugar.
Inlawlawag met ni Philippine Coast Guard (PCG) spokesman for the West Philippine Sea (WPS) Jay Tarriela nga inpatuloddan iti lugar ti BRP Teresa Magbanua tapno malappedan ti panagasideg pay ti monster ship iti Pilipinas ngem kinasapulan a pagsublien iti Port of Bataan kalpasan a nag-overheat.
Gapu iti daytoy, napilitan ti nasao a barko nga agsubli iti Port of Bataan isu a naaramid manen ti ‘monster ship’ a makaasideg iti area ti Pundaquit, Zambales.
Naminsan manen a nagsubli ti BRP Teresa Magbanua iti panagbantay iti monster ship kaduanan ti BRP Gabriela Silang.
Innayon ni Malaya a ti Department of Foreign Affairs (DFA) ket nangiparuk-at ti diplomatic protest kontra iti presensia ti monster ship.
