LAOAG CITY – Manamnama a mangrugi iti masungad a tawen ket adda ipaay ti Provincial Government of Ilocos Norte babaen iti Metro Ilocos Norte Council (MINC) a Medical ken burial assistance para iti “transport sector” a rehistrado iti Metro Ilocos Norte Council.
Inlawlawag ni Atty. Athena Nicolette “Nikki” Pilar, Officer In-charge ti Metro Ilocos Norte Council a napanunutanda nga inkiddawan daytoy ti pondo ken ni Gob. Matthew Marcos Manotoc kalpasan nga adu dagiti maaw-awat da nga aplikasyon a mangipadas nga agkiddaw nupay ammo dagitoy a dagiti laeng mainanaig iti aksidente ti maipapaayan iti nasao a tulong itay kallabes.
Siraragsak a nangipakaammo nga inmannamong ti gobernador ken inaprobaran ti Sang. Panlalawigan nga idadauloan ni Bise Gob. Cecilia Araneta Marcos.
Mainaig iti daytoy, inpanamnamana a ti pondo ti maipaay a tulong kadagiti pamilia dagiti rehistrado iti Metro Ilocos Norte Council a pimmusay gapu iti panagsakit wenno dadduma pay nga insidente malaksid iti aksidente, pakairamanan dagiti mapaagasan iti hospital nga agsakit ket aggaponto iti Metro Ilocos Norte Council ken saan da nga idawatan pay ti tulong manipod iti sabali nga opisina.
Malaksid iti daytoy, impalgakna nga adda pay ti sabali a programa a kalikagumda a maipatungpal iti masungad a tawen kas paset iti kalikagom da nga ad-adda pay a mapatibker ti panagkakammayet dagiti adda iti transport sector ditoy probinsia.
Inbunannagna a daytoy ket ti Metro Ilocos Norte Council sports Fest ken addanto pay ti pasetna a panaglaban ti Provincial Government of Ilocos Norte All Star ken Metro Ilocos Norte Council All Star.
Kabayatanna, namnamaen na a patgan ti gobernador a daytoy ti mangidaulo iti team ti Provincial Government of Ilocos Norte All Star.
