LAOAG CITY – Dua a baro a nailian a rekord ti nagun-od iti agtultuloy a Palarong Pambansa 2025 kalpasan nagballigi dagiti atleta manipud iti Western Visayas iti tay-ak ti athletics.
Iti dua a nagsina nga event—110-meter hurdles ken discus throw para iti secondary boys ket pormalen a naibasura dagiti dati a rekord kalpasan dagiti naisangsangayan laban da Mico Villaran ken Josh Gabriel Salcedo.
Iti 110-meter hurdles secondary boys, naan-anay a binurak ni Villaran ti nabayagen a rekord a 14.68 a segundo a nagun-od ni Patrick Ma Unso ti National Capital Region (NCR) idi 2010.
Iti makapatengngel anges a laban, linippas ni Villaran ti karera iti uneg laeng ti 14.00 a segundo, maysa a dakkel a banag iti lubong ti hurdling.
Naammoan a kalpasan ti panangabakna, inburay ni Villaran ti kaririknana ken sakripisio iti likud ti panagballigina.
Kunana a sipod pay idi Palaro 2023, isunan ti agbalbalin a kampeon iti nasao nga event ngem saan a maburburak ti rekord.
Inbatadna nga ita a tawen ket ibilangna daytoy a dakkel a baalligi para kenkuana.
Inlawlawagna nga inaldaw ti panagsanayda ken ti laeng panaginanada ket tunggal Domingo.
Segun kenkuana, amin a bannog ken sakripisioda ket sulit kalpasan a nangabak ken nagun-od ti baro a rekord ti Palaro.
Iti tay-ak ti discus throw para iti secondary boys, maysa met a baro a rekord ti nagun-odda.
Ni Josh Gabriel Salcedo ti nakairekord ti baro a pakasaritaan kalpasan nga inbatona ti disc iti kaadayo a 45.52 metro, nalawag a naartapanna iti dati a rekord a 42.86 metro nga iggem ni Airex Gabriel Villanueva ti Bacolod sipod pay idi 2023.
Ti dua a baro a rekord ket pammaneknek ti umig-iget a kompetision iti tinawen a Palarong Pambansa.
Kabayatanna, basar kadagiti coach ti Western Visayas, dagitoy a balligi ket resulta ti naiget a panagsagsaganada, disiplina ken suporta manipud iti rehion ken dagiti pagadalan.
