LAOAG CITY – Dua a behikulo a nagkarga ti naruay a sibibiag a baboy ti nasaed dagiti kameng ti Philippine National Police kadwa da dagiti kameng ti Provincial Veterinary Office iti insayangkat da a checkpoint operation iti paset ti Barangay Pasaleng iti ili ti Pagudpud.
Basar iti report, ti umuna a behikulo a maysa a Toyota Hi-lux nga agmaris ti gray ket inturong ni Arjay Laddaran, agtawen ti 33, awanan ti asawa, ken adda ti dua a pasahero na nga isuda Ron Vincent Gumatero, agtawen ti 18, awanan ti asawa ken ni Daniel Naganag, agtawen ti 18, awanan ti asawa ken agpapada dagitoy a residente iti Tabuk, Kalinga.
Inbatad ti Philippine National Police a ti behikulo nga inturong ni Laddaran ket naglaon ti 43 a sibibiag a baboy ken awan ti naipakita da a dokumento para iti pannakaibiyahe dagiti dingwen.
Kabayatanna, ti maikadwa a behikulo ket Utility Vehicle Wagon nga inturong ni Warlito Jose, agtawen ti 22, awanan ti asawa ken residente iti Pili Alto Cabagan, Isabela ken ti kadwa na a ni Jhowelyn Ramos, agtawen ti 34, awanan ti asawa ken residente iti Claveria, Cagayan.
Naglaon met iti behikulo nga inturong ni Jose ti 40 a sibibiag a baboy ken awan ti umiso a dokumento dagitoy.
Inpakaammo dagiti otoridad a dagiti maseknan nga indibidual karaman dagiti inbiyahe da a baboy ket naiturnover iti nangibagi iti Provincial Veterinary Office a ni Mr. Gerone Mamuad para iti proper disposition.
Naiyisoan met ti ticket dagiti driver para iti panaglabsing ti Provincial Ordinance.
