LAOAG CITY – Natukkol dagiti saka dagiti dua a driver ti motorsiklo ken tricycle kalpasan a nagdinnungpar da iti Brgy. Saludares iti ili a Dingras.
Nabibig ti driver ti motorsiklo a ni Rosel Lopez Ruiz, 31, naasawaan, welder ken residente iti Brgy. Mabuti iti ili a Marcos idinto a ti driver ti tricycle ket ni Fernando Estavillo Verdadero, 47, naasawaan, maysa a mannalon ken residente iti Brgy Lidia iti nasao met laeng nga ili.
Basar ti inisyal nga imbestigasyon ti PNP Dingras, agpapaamyanan a direksyon ti tricycle idi iti linya ti motorsiklo a puon ti panagdinnungpar da.
Nagsagaba ni Verdadero ti tukkol ti akin-kannawan a saka ken sugat iti muging na idinto a ni Ruiz ket natukkol ti akin-kannigid nga ima ken saka na.
Naitaray dagiti dua a driver iti Dingras District Hospital ngem naiyakar iti Mariano Marcos Memorial Hospital and Medical Center idiay ciudad ti Batac
Segun kenni Pol Maj. Ryan Retotar, Chief of Police ti PNP Dingras, nagalis ti kalsada kalpasan iti panagtudo iti nasao nga ili.
