LAOAG CITY – Natiliw dagiti dua a chinese national idiay Pagudpud, Ilocos Norte kalpasan nga intarayan da ti inarkila da a taxui manipod iti Manila.
Binigbig ni Executive Master Sergeant Wenses Lao Villaflor, ti deputy chief of police iti ili ti Pagudpud dagiti suspek a da Jun Yuan, agtawen ti 22 ken ni Zhiying Lioa, agtawen ti 21.
Inbatad ni Villaflor nga intawag kadakuada ti maysa a kadwa da nga agbanbantay iti sumrek iti maysa a mabigbig a resort iti Barangay Balaoi kalpasan a nakita na dagiti dua nga indibidual a mapagduduwaan ti tignayda nga agwarang-warang iti lugar.
Kuna ni Villafor nga iti panagturong da iti lugar ket nakumpirmaran a gangannaet dagitoy.
Gapu ti daytoy, inbatad ni Villaflor nga inalaanda ti ladawan dagiti dua ken inpatulod da iti PNP-Provincial Office babaen ti viber.
Inlawlawag na a nairana nga adda ti napan nagreport iti PNP-Bacarra a maysa a taxi driver a maipagarop nga intarayan dagiti dua a gangannaet.
Kabayatanna, nakapungtot ni Mr. Paul Verzosa, ti mangidadaulo iti Bureau of Immigration and Deportation (BID) ditoy ciudad ti Laoag gapu iti inaramid dagiti dua a chinese national iti inarkila da a taxi manipod idiay Manila.
Inpetteng na nga apaman a naidanun kadakuada ti report ket dagus nga insagana da ti reklamo kas ti overstaying, undocumented ken dadduma pay para ti pannakaideportar dagiti dua a chinese national.
Inbatad ni Verzosa nga awan pulos ti naipakita a dokumento ti maysa kadagiti suspek idinto a ti maysa ket napaneknekan nga overstaying ditoy pagilyan.
Kabayatanna, inpetteng ni Verzosa a gapu ti kinalukay ni Presidente Rodrigo Duterte ket alisto laeng para kadagiti gangannaet ti sumrek ditoy pagilyan ken maaramid ti kayat da nga aramiden uray pakaisagmakan dagiti Pilipino.
Immuna ti daytoy, kinumpirmaran ni Mr. Joel Corpuz ditoy ciudad ti Laoag a dagiti natiliw a dua a chinese national ti nangarkila ti van da ngem apaman a nakadanun da idiay San Simon, Pampanga ket intarayada dagiti driver da ken saanen a nagbayad pay.
Innayon ni Corpuz nga awanen ti plano na nga agreklamo gapu ta ti napateg ket natiliwen dagitoy.
