LAOAG CITY – Dua a closed van a nagkarga ti 14 a baboy ti naabandonar iti paset ti Barangay Turod iti ili ti Badoc.
Basar iti Philippine National Police, nakaawat da ti report manipod iti 2nd Provincial Mobile Force Company seknan iti nakita a naabandonar a dua a behikulo iti paset ti sition Catanubungan iti Barangay Turod iti nadakamat nga ili.
Iti panagresponde dagiti kameng ti Philippine National Police ket sinukimat da ti dua a closed van a dagitoy ket addaan ti plate number nga XMX322 ken UTH262 a nakaipalaonan ti 14 a baboy.
Ginandat dagiti kameng ti pulisya a sapulen dagiti nakalugan iti dua a behikulo ngem saanda a nakita dagitoy.
Gapu iti daytoy, naipasidong iti Philippine National Police iti ili ti Badoc dagiti dua a behikulo idinto a dagiti kargada a baboy ket adda iti biang ti Provincial Animal Paraffin Station.
Agtultuloy ti imbestigasyon dagiti otoridad tapno maamoan no siasinno dagiti nangabandonar kadagiti behikulo a nagkarga kadagiti baboy iti nadakamat a lugar.
