LAOAG CITY – Naarestar ti dua a construction worker iti insayangkat nga Anti-illegal drug buy-bust operation dagiti kameng ti Philippine National Police iti national highway bisinidad iti Barangay 24, Sta. Monica iti ili ti San Nicolas.
Binigbig ni Police Lt. Jomar Sernande, ti Deputy Chief of Police iti ili ti San Nicolas dagiti naarestar a construction worker nga isuda Jestoni Pagaduan, agtawen ti 29, naasawaan ken ni Edwardo Bumanglag, agtawen ti 55, agpada a residente iti Barangay 23, Sta. Cecilia iti nadakamat nga ili.
Segun ken ni Sernande, ti subject iti operasyon da ket ni Pagaduan ngem nairaman nga inarestar da ni Bumanglag gapu ta nagkuyug dagitoy nga agawid koman iti balay da manipod iti trabaho da babaen iti panaglugan da ti kurung-kurung.
Inbatad ni Sernande a ni Pagaduan ket naglako ti maysa a sachet a naglaon ti maatap a shabu babaen iti nagpammarang kas police poseur-buyer.
Kuna na nga iti panangukag dagiti otoridad ti maysa kadagiti sling bag ni Pagaduan ket nakita pay ditoy ti maysa a caliber 38 revolver nga addaan ti uppat a bala ken ti P1000 a pisos a nausar iti operasyon idinto a ti laeng nakita iti bag ni Bumanglag ket dagiti personal a gamit na.
Mainaig iti daytoy, iti pannakisarisarita ti news team ti Bombo Radyo ken ni Pagaduan ket naiget a naglikudan na ti alegasyon kenkuana, ken inpetteng na a saanna a bagi dagiti naala a maatap a shabu ken ti paltog nga addaan ti bala.
Kabayatanna, inpakaammoa ni Sernande a ni Pagaduan ket Newly Identified Drug Personality.
Naamoan a ti nasao a subject ti operasyon ket addan ti pannakatiliw na idi 2016 gapu iti panaglabsing na iti Republic Act 10591 wenno “Comprehensive Firearms and Ammunition Regulation Act” ngem naibasura ti kaso isut gapu na a nawaya-wayaan kalpasan ti panagtalinaed na iti pagbaludan iti agarop maysa a tawen.
Iti agdama, nagtalinaed iti Philippine National Police iti ili ti San Nicolas da Pagaduan ken Bumanglag.
