LAOAG CITY – Pimmusay ti dua a construction workers kalpasan a natupakan da ti landok kabayatan ti panagtrabaho da iti maar-aramid a by-pass road iti paset ti Barangay 3, San Ildefonso iti ili ti San Nicolas.
Daytoy ti kinumpirmaran ni Engr. Eric Jay Viernes, ti project engineer iti nasao a proyekto.
Binigbig na dagiti biktima nga isuda Edgar Cantanero y Yadan, agtawen ti 39, awanan ti asawa, taga Bry. Jones, San Sebastian, Isabela ken ni Freddie Palacay, addaan iti umno a tawen, taga Ismael Nagtipunan, Quirino Province, ngem agpada dagitoy nga agnanaed iti Brgy. 3 iti ili ti San Nicolas.
Inpasigurado ni Viernes ti pannakaipaay ti naan-anay a tulong para iti pamilya dagiti pimmusay a construction workers iti ili ti San Nicolas.
Patien na nga aksidente laeng ti napasamak kadagiti biktima.
Maladingitan ni Viernes gapu ta agarop lima a tawenen a trabahador da dagiti biktima.
Kabayatanna, inbatad ni Police Lt. Ashley Cacayorin, ti Deputy Chief of Police iti ili ti San Nicolas a nangiyuswat da a dagus ti imbestigasyon kalpasan a naireport kadakuada ti napasamak kadagiti dua a construction workers iti Brgy. 3 iti nasao nga ili.
Segun kenkuana, iti imbestigasyon da ket napasamak ti insidente kabayatan ti panagigalot kadagiti landok a maipan a pundasyon ti maar-aramid a rangtay.
Kuna na nagcollapse ti nangiparabawan da ti rebarcage no sadinno nga adda iti uneg dagiti biktima pakairamanan ti maysa pay a kadwa da.
Nupay kasta, nakataray ti maysa a construction worker a ni Mike Mabuti idinto a dagiti dua nga isuda Edgar Cantanero y Yadan ken ni Freddie Palacay ket natupakan da.
Naitaray dagiti biktima iti ospital ngem pimmusay dagitoy kabayatan a maag-agasan.
Inpetteng ni Cacayorin nga adda ti suot a safety gears dagiti construction workers ngem saan a makaumanay tapno maprotehiran ti bagi da gapu iti kinadagsen ti landok.
Ti proyekto ket kukua ti construction firm a Telcom Company iti Quirino ngem imanmanihir ni project Engineer Eric Jay Viernes.
Agtultuloy ti imbestigasyon ti Philippine National Police seknan iti napasamak.
Mabalin a pilaan ti pamilya dagiti biktima ti reklamo a Reckless Imprudence Resulting in Multiple Homicide ti siasinno man a mapaneknekan nga adda ti nalabsing na iti napasamak.
Kabayatanna, inbatad ti nakalasat a construction worker a ni Mike Mabuti a nabayagen nga ar-aramiden da ti agikabil iti rebarcage ngem masdaaw gapu ta ita laeng a napasamak ti panag-collapse na a nakatayan ti dua a kadwa da.
Inadmitir na nga agpapan ita ket arigna saanna paylaeng a mailiwliwag ti pinasar da.
