LAOAG CITY – Naladingit ti sibubukel a Barangay Bil-loca iti ciudad ti Batac gapo iti ipupusay dagiti dua a residente a positibo iti covid-19.
Dagitoy ket isuda IN-C5319, babai, agtawen ti 75 ken ni IN-C5321, lalaki, agtawen ti 78.
Segun kenni Barangay Kagawad Brenda Baclig, chairman ti Committee on Health iti nadakamat barangay, ni IN-C5321 ket addaan ti stomach aneurysm ken dumaldalan iti dialysis.
Kunana a naitaray daytoy iti ospital kalpasan a naawanan ti puot na idinto a ni IN-C5319 ket marigatan nga umanges ngem saan metten a naisalbar ti biag da.
Inbatad na a kalpasan a pimmusay dagitoy ket naidalan latta iti swab test ken positibo ti resulta dagitoy.
Mainaig iti daytoy, kuna ni Baclig a dagus a naipremate dagiti bangkay dagiti dua ken saan met unay nga ado dagiti nacontact trace gapo ta dagiti dua a pimmusay ket agpada a maysa laeng ti kabbalay da.
