LAOAG CITY – Naisadsad dagiti dua a foreign vessel ti China iti kabaybayan a sakupen iti Brgy. Victoria iti ili ti Currimao.
Segun ken ni Lt. Joseph Christian Sagun, Provincial Commander Coast Guard ti Ilocos Norte, dagiti dua a barko ket Panphil8 ken MV Aries ket agpada dagitoy nga aggapu idiay China.
Inbatadna nga agarup alas dose ti rabii ket naripar dagiti personnel ti Provincial Office nga in-inot a maisadsadsad ti Panphil8 rason a tinawaganda isuda ket ditoy nga inbagada kadakuada a nabunot ti angklada gapu iti kinapigsa ti angin ken dalluyong gapu iti Bagyo Marce.
Kunana a kabayatan nga agbirbirok ti napintas a puesto ti MV Aries gapu iti napigsa nga angin ken dalluyong ket kellaat a nagkaproblemada iti makinada agingga a naisadsad daytoy.
Inlawlawagna nga iti kabigatanna ket dagusda napan kinita dagiti dua a barko no sadinno nga awan ti napasamak nga oil spill wenno pannakadadael dagiti barko.
Kunana nga adda dagiti dua a barko ditoy probinsia gapu ta agpasukatda ti panagparehistro para iti Philippine Registry.
Mainaig iti daytoy, inpakaammo ni Lt. Sagun a ti Panphil8 ket simmangpet idi laeng Lunes idinto a ti MV Aries ket addan ti lima a bulanen nga agtaltalinaed ditoy probinsia.
Innayonna nga iyur-urayda dagiti maseknan nga agent dagiti dua a barko tapno mapagnunumoanda ti plano a sumaruno nga aramidenda tapno maikkaten iti lugar a nakaisadsadanda.
Kabayatanna, naammoan a natalged met dagiti nakalugan a 15 a crew ti Panphil8 ken 10 a crew ti MV Aries.
