LAOAG CITY – Nagkakabil dagiti dua a grupo dagiti lallaki iti paset ti nagbedngan ti Barangay 9 ken Barangay 10 ditoy ciudad ti Laoag kalpasan a naggapo da iti paggi-inuman.
Segun ti maysa a miembro ti innem a lallaki, nagkukuyog da mapan aglomi iti nasao a lugar idi maipagarop a kinarit dagiti tallo a lallaki.
Gapo iti daytoy, nagkakabil dagiti lallaki ken napang-or ti akin-kannigid nga ulo ti maysa kadagiti innem a nagkukuyog usar ti bote ken nadanog met ti rupa ti maysa kadagiti tallo a kimmarit rason nga adda iti ospital ditoy ciudad idinto a nakataray dagiti dua.
Inbatad met ni Mr. Rommel Antonio, maysa kadagiti innem a lallaki, idi mapan da iti panganan ket maipagarop a kellaat a nagbakal ti bote dagiti tallo a lallaki ken adda pay ti iggem da a dos por dos.
Inlawlawag na a napilitan da a limmaban kas self defense.
Naamoan a dagiti innem a nagkukuyog ket agpapada nga empleado ti maysa a rice mill.
Agtultuloy ti imbestigasyon dagiti otoridad tapno maamoan no siasinno dagiti lallaki partikular ti dua a nakataray.
