LAOAG CITY – Inpakaammo ni Patrolman James Dulay ti Duty Desk Officer ti Philippine National Police Laoag Traffic Division, agtultuloy ti isaysayangkatda nga imbestigasion pakaseknan iti napasamak a hit and run idi rabii di kalman iti paset ti maysa a fast food chain iti Bacarra Road a sakupen iti Brgy. 11 ditoy Siudad ti Laoag.
Segun kenkuana, basar iti panakisarsaritana ken ni Mrs. Geneve Acosta, driver ti kotse a wigo, model 2020 nga addaan ti plate number a 7721 nga agmaris ti silver ket apaman nga agawiddan a napan nagitulod kadagiti katrabahoanda ket adda ti napanda dinagas ket dita a kellaat nga adda ti dimmungpar iti likod ti kotseda.
Gapu iti daytoy, kunana a dagusda a kinamat ti nakamotorsiklo a mapapati a Mio Motorcycle nga agmaris ti puraw, nakasuot ti driver ti helmet ken nakabado ti sando nga agmaris ti maroon wenno brown nga addaan ti tatak a numero 8.
Inlawlawagna a basar pay iti nakalapda nga impormasion ket napaspas ti motorsiklo agingga a saanen a naabutan dagiti maseknan.
Mainaig iti daytoy, agkiddaw ti PNP Laoag Traffic Division ti kopya ti CCTV Camera kadagiti establishmento nga asideg iti nakapasamakan ti insidente para iti nayun a tulong iti panagtalidted ti imbestigasion.
Kabayatanna, agtultuloy pay ti maisaysayangkat nga imbestigasion iti maysa pay a pasamak nga hit and run iti Brgy. 21 ditoy Siudad ti Laoag kalpasan nga adda ti motorsiklo a Honda PCX nga agmaris ti puraw nga inturong ni Benedict Domingo, agtawen ti 22 ken residente ti Brgy. 8 iti ili ti San Nicolas ket dita a kellaat a dinungpar ti SUV nga agmaris ti puraw nga intarayanna ti nakamotorsiklo a natulid iti kalsada.
