LAOAG CITY – Agtultuloy ti naun-uneg nga imbestigasyon dagiti kameng ti Bureau of Fire Protection (BFP) iti ili ti Bacarra kalpasan ti pannakauram ti dua a kadsaaran na a pagtaengan iti Purok 6, Barangay 9, San Agustin II iti nadakamat nga ili.
Segun kenni Fire Inspector Edison Reyes, Fire Marshall iti BFP-Bacarra, itay bigat ket adda ti naawat da a tawag manipud iti Office of Public Safety seknan iti uram iti family house a kukua ti pamilya Velasco.
Gapo iti daytoy, dagus da a nagresponde ket idi nakadanaon da iti lugar ket nabengbeng ti asok iti maikadua a kadsaaran ken kalpasan ti 15 a minutos ket kontroladon ti apoy.
Karaman kadagiti nauram ket ti bobeda ti kwarto iti ngato ti balay, badbado, cellphones ken dadduma pay.
Inlawlawag na a dua nga anggulo ti kitkitaen da a nangrugyan ti apoy no sadinno ket nauram ti agserserbi a dirty kitchen ken iti maysa a kwarto iti ngato ti balay.
Inbatad na nga iti inisyal nga imbestigasyon da, awan met ti nakasaksak a kagamitan wenno gadget iti maikadua a kadsaaran ti pagtaengan ken iti ditry kitchen ket awan met ti nakasaang wenno manarimaan a malutluto.
Kunana a gapo iti daytoy ket dakkel a karit kadakuada no anya ti namunganayan ti uram iti dua a paset ti pagtaengan.
Mapatta-pattta nga agbalor ti 50 a ribo a pisos dagiti nauram a kagamitan iti nasao a pagtaengan.
Naamoan nga idi napasamak ti uram ket agar-arbis wenno kaliplippas laeng ti napigsa a tudo.
Kabayatanna, nagpalagip ni Reyes nga agannad ken agalerto tapno maliklikan ti kastoy a pasamak.
