LAOAG CITY – Nagreport ni Fire Chief Insp. Roxane Parado iti PNP Laoag seknan ti panaggiinom dagiti dua a kameng ti Bureau of Fire Protection bayat a nakaduty.
Nabigbig dagiti dua a kameng ti BFP a da SFO1 Victor Apostol Caise, residente iti Brgy 6 ditoy siudad kenni SFO1 Charlie Balanay Simisim, residente iti Brgy. 7 Caunayan iti siudad ti Batac.
Basar iti report manipud iti PNP Laoag, nakita ni Parado da Caise kenni Simisim nga agin-inom iti Finance Section ti opisina da bayat a nakaduty da.
Idi komprontaren ni Parado dagiti dua ket kelaat a timmakder ni Simisim ken insawang na ti “Ano to Set-up” ken maipagarup nga awan iti respeto ken panagcourtesy na iti fire marshal.
Nairita ni Simisim ken ginandat na a dangran ni Parado ngem naanawa dagiti pada da a kameng ti BFP.
Kabayatanna, binalakadan ni Parado da Simisim kenni Caise kalpasan iti idadalan da iti medical examination.
Nupay kasta, nagdesisyon a nagtalinaed ni Simisim iti fire station.
Iti sabali a bangir, iti kabigatan na iti agarup alas-singko kuarenta y singko idi Mayo 22, nagturong ti asawa ni SFO1 Simisim a ni Ethel Jay Alamon Simisim iti fire station ken kinomprontar na wenno kwinestiyonaran na ti panangdisiplina ni Parado kadagiti personnel na.
Iti mainaig a damag, kinumpirmaran ni Fire Chief Insp. Roxane Parado a naipasa nan ti report iti BFP Provincial Office mainaig ti panaggiinom da SFO1 Victor Apostol Caise, kenni SFO1 Charlie Balanay Simisim.
Kuna na nga ipila na laeng kuma ti administrative case ngem nagpablotter ni Simisim a nadangran babaen kenni Parado.
Naiget a naglikudan ni Parado ti alegasyon gapu ta isuna mismo ti nakakita kadakuada nga agin-inom ti gin.
Inbatad na a nagblotter gapu ti saan a pannakarespeto kenkuana wenno nabastos az daytoy ket maibilang nga unjust vexation.
Innayon ni Parado saanen a damo a natiliwan na ni Simisim ken adda dagiti report na rumwar iti fire station uray nakaduty.
Awan met ti bayolente a reaksiyon ni Caise idi natiliwan ni Parado nga agin-inom da kenni Simisim.
