LAOAG CITY – Maladingitan ni Fire Supt. Floro Obrero, ti Provincial Firemarshall iti Bureau of Fire Protection (BFP) ditoy probinsya kalpasan nga adda ti dua a kadwa da a nagpositibo ti covid-19 virus.
Iti eksklusibo nga interview ti Bombo Radyo Laoag ken ni Obrero, inbaga na a ti maysa a nagpositibo ti covid-19 virus ket personnel iti BFP-Ilocos Norte idinto a ti maysa ket kameng iti BFP-Regional Office da ngem agpada dagitoy a residente ditoy probinsya.
Segun ken ni Obrero, naggapo iti maysa nga orientation course iti national capital region (NCR) dagiti dua a kameng ti BFP ken na-exposed da iti barracks da.
Kuna na a naggiddan dagiti dua a nagawid ngem saan da a nagkalugan.
Inbaga na nga iti iseserrek da iti border ket dimmalan da iti antigen-test no sadinno a ti maysa ket nagpositibo idinto a ti maysa ket nagnegatibo.
Inpakaammo ni Obrero a kalpasan a naamoan ti maysa a positibo ti resulta ti antigen-test ti kadwa na ket nakikoordinar a dagus iti health office da.
Iti idadalan ti maysa iti confirmatory test ket ditoy met a nagpositibo iti swab test na.
Gapu iti daytoy, inbaga ni Obrero a kalpasan a naamoan a postibo ti swab test ti maysa pay ket dagus a naipan iti quarantine facility da.
Inpasingked ni Obrero a saan a naapektaran ti operasyon ken dadduma a kameng ti BFP ditoy probinsya gapu ta ti nagpositibo ti covid-19 a kadwa da ket nagtalinaed idiay NCR sipud pay idi Enero ita a tawen gapu iti panagatendar da iti orientation course.
Kabayatanna, kuna ni Obrero a tinawagan na dagiti kakadwa da a nagpositibo ti covid-19 ket naamoan na a nasayaat met ti kasasaad da.
Innayon na nga iyur-uray laeng dagiti maseknan ti naan-anay a pannakarekobre da ken palpasen da ti naituding nga aldaw a panag-quarantine da.
