LAOAG CITY – Umabot iti tallo a tattao ti natay kalpasan a rinaot dagiti armado a lallaki kabayatan ti panaglukat ti kadakkelan a pampubliko nga ospital idiay Haiti.
Basar iti report, karaman kadagiti natay ket dua a kameng ti media ken maysa a pulis.
Malaksid kadagiti natay ket adda pay ti sumagmamano a kameng ti media a nasugatan iti insidente.
Naamoan nga agur-uray dagiti kameng ti media iti isasangpet ni Health Minister Lorthe Blema idi kellaat lattan a simmangpet dagiti armado a grupo kalpasan na ket nagpaltu-paltog dagitoy iti lugar.
Mainaig iti daytoy, indanun ni Presidential transitional council Head Leslie Voltaire ti pannakipagladingit na iti pamilya dagiti biktima, karaman ti Haiti National Police ken amin a journalists’ associations.
Inpasigurado na nga agsungbat dagiti adda iti likudan ti nakaam-ames nga insidente.
