LAOAG CITY – Naipilan ti kaso a physical injury kontra kadagiti dua a kameng ti PNP-Batac gapo iti panagdangran iti maysa a restobar iti Barangay Bil-loca iti nasao a ciudad.
Nabigbig dagitoy a da Police Chief Master Sergeant Arnold Libres ken Police Staff Sergeant Ronaldo Abaya nga isu ti innaganan dagiti suspek a ni Reynaldo Cuntapay ken maysa pay a singer.
Segun kenni Police Major Rodelio Santos, mangidadaulo ti Provincial Investigation and Detective Management Branch iti Camp Valentin S Juan, naipila ti kaso babaen ti regular filing.
Naamoan a naduktalan ti INPPO a sangapulo amin dagiti pulis pakairamanan ti dati nga hepe a ni Police Lt. Col. Reynaldo Michael Agoncillo II a napan naggi-inum iti restobar.
Kadwa ni Agoncillo da Police Chief Master Sergeant Arnold Libres, Police Chief Master Sergeant Jonathan Matias, Police Staff Sergeant Warren dela Cruz, Police Staff Sergeant Winelmar Aganus, Police Staff Sergeant Roel Salamitao, Police Staff Sergeant Ronald Abaya, Police Staff Sergeant Reynold Claveria, Police Corporal Loiue Yague, Police Staff Sergeant Rey Lugto.
Maipalagip nga ummuna a naireliboan ni Agoncillo ken simmaruno met dagiti adda iti babaen na a kadwa na a naginom.
Innayon ni Santos nga iti sumarsaruno nga aldaw ket maipila met ti kaso administratibo kontra kadagiti nadakamat a pulis.
Iti agdama ket adda iti kustudyar ti PNP Provincial Office dagiti pulis.
