LAOAG CITY – Addan ti nairekord a dua a kaso ti covid-19 ditoy probinsya ti Ilocos Norte.
Iti public advisory ti Mariano Marcos Memorial Hospital and Medical Center iti ciudad ti Batac, dua kadagiti uppat a Person Under Investigation (PUI) ket nagpositibo iti nasao a virus.
Segun iti nasao nga ospital, dagiti dua a nagpositibo ti covid-19 ken naka-isolation ken adda da iti stable a kasasaad.
Inpasingked ti liderato ti ospital nga aramiden da amin a kabaelan da tapno masalwadan ken maagasan dagiti nasao a pasyente.
Kabayatanna, inrakurak ti ospital nga indanun da a dagus iti Provincial Government of Ilocos Norte ken Provincial Health Office ti resulta nga inparuk-at ti Research Institute for Tropical Medicine (RITM) para iti maisayangkat a contact tracing tapno maestablisar no siasinno dagiti nakapulapol ken nagturturungan dagiti dua a pasyente a nagpositibo ti covid-19.
