LAOAG CITY – Nagdinnungpar ti dua a kurong-kurong iti Brgy. Banban iti ili ti Bangui.
Nabigbig ti driver ti kurong-kurong a ni Mark Lester y Cariño, agtawen ti 24, awanan asawa ken ti kaduana a ni Aby Geris y Hugo, agtawen ti 47, awanan asawa ken agpada a residente ti Brgy. Manayon iti ili ti Bangui.
Nabigbig met ti maysa pay a nangiturong ti kurong-kurong a ni Danny Saulda y Ganno, agtawen ti 44, naasawaan, construction worker ken residente ti Brgy. Utol iti nasao met laeng nga ili.
Basar iti Bangui Municipal Police Station, kabayatan a dumaldalyasat ti kurong-kurong nga agpa-amianan ket immagaw ti linya iti kalsada a nangitunda ti panagdinnungparda ti maysa met laeng a kurong-kurong.
Gapu iti daytoy, nagsagaba ti sugat iti akin-kannigid a luppo dagiti agpada a driver idinto ti kadua ti maysa kadagiti naka-kurong-kurong ket nagsagaba met ti sugat iti rupa ken nagduduma a paset ti bagina a dagus a naitaray dagitoy iti Bangui District Hospital ngem naiyakarda iti Mariano Marcos Memorial Hospital and Medical Center iti siudad ti Batac para iti naan-anay a pannakatamingda.
Naammoan nga agpada a nabartek dagiti dua a driver idi napasamak ti insidente.
Kabayatanna, agpada pay nga awan ti naipakita a lisensia dagiti maseknan a driver ken saan dagitoy a nakasuot ti reflectorized vest.
