LAOAG CITY – Natiliw dagiti dua a lallaki kalpasan a nagtakaw da ti tallo a kalding iti paset ti Barangay Magnuang iti ciudad ti Batac.
Naamoan a dagiti suspek ket agtawen ti 29 ken 27, agpada dagitoy nga awanan ti trabaho ken residente dagitoy iti Barangay Victoria iti ili ti Currimao.
Iti imbestigasyon, kabayatan ti panangilugan dagiti suspek kadagiti tallo a kalding nga innala da a mismo iti nakaipupukan da ket nakita ida ti mismo nga akintaraken kadagitoy.
Naamoan nga iti panangbugkaw ti akintaraken kadagiti suspek ket nataranta da isut gapuna a nagtaray da a kimmamang iti kabanbantayan a paset ti nasao a lugar.
Immunan nga inbaga ni Police Major Artemio Clemente, ti chief of police iti ciudad ti Batac a ti nagluganan dagiti suspek ket maysa a motorsiklo ken kurung-kurong.
Nabigbig ti kinatao dagiti suspek babaen ti nabati da a pitaka iti motorsiklo nga ayan ti driver’s licence ti maysa kadagitoy.
Inadmitir dagiti dua a suspek a naaramid da ti nagtakaw ti kalding gapu iti kinarigat ti panagbiag no sadinno a ti maysa kadagitoy ket mapaspasangasangan ti panagpasngay ti masikog nga asawa na.
Inbaga ti maysa kadagiti suspek a dagiti koma kalding ket partien ken ipauraga da tapno adda ti usaren da iti panagpasngay ti asawa na.
Maisagsaganan ti reklamo a maipila kontra kadagiti nasao a suspek.
