LAOAG CITY – Dua a lallaki dagiti dumalan iti preliminary investigastion kalpasan a nagusar ti peke nga antigen test result.
Daytoy ti inpakaamo ni PCapt. Joseph Tayaban, ti chief of police iti PNP Badoc.
Segun ken ni Tayaban, dagiti dua a lallaki ket agpada a naggapo iti Tarlac City ken agideliver ti construction materials ditoy probinsya.
Nu pay kasta, kuna na nga iti panangipresentar da kadagiti dokumento iti border checkpoint ket dita a naduktalan a peke ti inpresentarda nga antigen result.
Immuna iti daytoy, inbatad ni Tayaban a naipakustodyar dagiti maseknan iti PNP ngem napalusposanda met laeng kalpasan a pinatgan ti piskalya ti idadalanda ti imbestigasyon.
Mainaig iti daytoy, inpakaamo ti hepe a manipod Nobiembre itay napan a tawen ket addan 33 ti pakabuklan a bilang dagiti natiliw gapu iti panagusar ti peke nga antigen test result bayat ti panagserrek ditoy probinsya.
